Пубертет кај мачките започнува откако ќе наполнат 6 месеци па се до возраст од година и 6 месеци, мачињата созреваат во возрасни мачки – процес кој е и фасцинантен и фрустрирачки. Фасцинантниот дел е да се гледа како мало маче се трансформира, а фрустрирачкиот дел е тоа дека ќе имате крзнен тинејџер на 4 нозе дома 🐱.
Добредојдовте во адолесцентниот период на мачките 🐾
Во овој период на пубертет кај мачките, тие се полни со енергија која немаат секогаш идеја како да ја потрошат, па затоа почнуваат да го истражуваат својот карактер и територија – и кон вас и кон другите миленици во домот.
Оваа фаза често носи непосакувано однесување кај мачки, како гребење на мебел, уринирање за означување територија, карање со други мачки и искачување на високи површини. Сето тоа е дел од изградбата на идентитетот на вашето маче.
Сексуална зрелост кај женските мачки (еструсен период и парење)
Кога ќе влезат во пубертет, обично околу 6 месеци, мачките влегуваат во својот прв еструс (циклус). Пубертетот може да варира во зависност од сезоната и условите во кои живеат. Женските мачки се сезонски полиестрични животни, што значи дека имаат повеќе циклуси во текот на сезоната на парење.
Сезоната на парење кај мачките во Северната хемисфера обично започнува во јануари и трае до доцна есен. Домашните мачки, особено оние што живеат внатре, може да влезат во циклус во текот на целата година.
Еден еструсен циклус кај мачка трае 1–7 дена, а целиот циклус може да се протега 1–3 недели.
Иако крварење кај мачки во циклус е ретко видливо, нивното однесување се менува: стануваат поприврзани, мјаукаат гласно (особено ноќе), се тријат од предмети и луѓе, и покажуваат „поза на парење“ кога се галат. Некои женки можат да прскаат урина како сигнал за парење кон други мачки.
Ако забележите дека вашата мачка ги привлекува мажјаците од околината – тоа е јасен знак дека влегла во пубертет.
Гравидитет (бременост кај мачки)
Мачките имаат индуцирана овулација – значи, овулацијата се случува при самото парење. За да настапи овулација, потребни се 3–4 парења за помалку од 24 часа. Парењето е кратко и може да се случи со повеќе различни мажјаци, што значи дека мачињата во едно легло може да имаат различни татковци.
Гравидитет кај мачка трае околу 63 дена (9 недели).
Во првите 3 недели тешко се открива бременоста, но искусен ветеринар може да ги палпира фетусите од 28-32 ден.
Ултразвук е можно да се направи после 25-иот ден, а рендгенски снимки по 6 недели – иако не се препорачуваат рутински поради зрачењето.
Најефикасен начин за спречување на бременост кај мачки е со стерилизација. Прочитајте повеќе за стерилизација кај мачки тука.
Сексуална зрелост кај машките мачки (тинејџери со мисија)
Мажјаците понекогаш влегуваат во пубертет и порано – некаде помеѓу 4 до 7 месеци. Иако технички не се сметаат за целосно возрасни, тие се спремни за парење.
Во оваа фаза, машките мачки развиваат мускулест врат и образи, што е биолошка подготовка за конкуренција со други мажјаци. Иако не влегуваат во еструсен циклус како женките, тие покажуваат знаци на сексуална зрелост: прскање урина богата со тестостерон, завивање навечер, бегство од дома и потрага по женки.
Овие знаци може да станат проблематични ако мачката не е кастрирана. Прочитајте повеќе за кастрација кај мачки тука.
Ако сакате да осигурате здрава, среќна и контролирана репродукција (или нејзино избегнување) кај вашите мачки – разговарајте со ветеринар. Раното разбирање на репродуктивниот циклус кај мачките ви помага да го подобрите квалитетот на живот на вашето милениче.