Tag:

симптоми

Алергија кај кучињата

Исто како кај луѓето, кучињата покажуваат алергиски симптоми кога нивниот имун систем ги препознава секојдневните супстанци (алергени) како опасни. Иако овие алергени се нормално присутни во околината и безопасни за повеќето животни, куче со алергија би имало екстремно јака реакција на нив. Алергените можат да бидат проблематични кога се ихалирани, проголтани или кога ќе дојдат во контакт со кожата на кучето. Како што неговото тело ќе проба да се ослободи од овие алергени ќе се појават различни кожни, дигестивни или респираторни симптоми.

ГЛАВНИ СИМПТОМИ НА АЛЕРГИЈА:

– црвена, влажна или сува кожа која чеша
– зачестено чешање
– насолзени очи
– чешање на грбот или на коренот на опашката (најчесто при алергија на болви)
– чешање и инфекција на ушите
– кивање
– повраќање
– дијареа
– хрчење поради воспаление на грлото
– потечени перничиња на шепите и нивно гризење
– постојано лижење

Алергичните кучиња можат да страдаат и од секундарни бактериски и габични инфекции кои можат да предизвикаат опаѓање на крзното, првут и красти на кожата.

Секое куче може да развие алергија во било кој период од неговиот живот, но алергиските реакции се забележани дека се најчести кај расите на Териери, Сетери, Ретривери и брахицефаличните раси како Мопс, Булдог и Бостон Териери.

КОИ СЕ НАЈЧЕСТИ АЛЕРГЕНИ?

– дрва, трева и полен
– спори на мувла
– прашина и домашни прашински грини
– првут
– пердуви
– чад од цигари
– состојки во храната (пр. говедско, пилешко, свинско, пченка, пченица или соја)
– лекарства
– болви и продукти за превенција на болви
– парфеми
– средства за чистење
– ткаенини
– инсектицидни шампони
– гумени и пластични материјали

АЛЕРГИЈА НА ХРАНА

Кучињата можат да бидат алергични и на храна но најчесто е потребно да бидеме детективи за да откриеме точно на која супстанца се алергични.

Кучињата кои имаат алергија на храна ќе се чешаат интензивно, ќе имаат хронична инфекција на ушите и понекогаш гастроинтестинални проблеми како дијареа или повраќање. За да одредите на што точно реагира вашето куче ќе треба да направите диета со елиминација. Секој ден ќе отстранувате по една состојка од оброците кои му ги давате се додека не видите позитивна реакција. Доколку се работи за комерцијална храна на која што има алергиска реакција ќе треба целосно да го смените брендот. Доколку реакцијата се случила на првото давање сменете ја веднаш, доколку кучето е навикнато на таа храна ќе мора да ја менувате постепено во текот на една недела за да избегнете дополнителни проблеми со желудникот и цревата. Пример, доколку вашето куче покаже алергија на пилешко, ќе мора да ги избегнувате сите храни и продукти кои содржат пилешки протеин или пилешки масти во нив.
Алергија на храна кај кучињата може да се појави на било која возраст.

Доколку се сомневате дека вашето куче има алергиска реакција на нешто однесете го веднаш кај вашиот ветеринар. Откако ќе му раскажете детално за појавата и природата на симптомите, ветеринарот може веднаш да ја утврди причината за алергијата, а доколку тоа не е можно ќе препорача да се направат дополнителни тестирања на крвта или кожата. Во Македонија се уште не се практикуваат стандардните кожни (интрадермални) алерго тестови.

ТЕРАПИЈА

Најдобриот начин за терапирање на алергија е да се отстрани алергенот од околината на пациентот.

– При алергија на болви најдобрата терапија е превенција на болвите. Заштитете ги вашите миленици пред да започне сезоната на болви. Ако не сте сигурни кој продукт е најдобар, консултирајте се со вашиот ветеринар.

– Ако причината за алергија е прашина, чистете го креветчето на кучето еднаш неделно и чистете го домот со правосмукалка барем два пати неделно (ова ги вклучува и сите теписи, завеси и други материјали на кои се собира прашина)

– Капење еднаш неделно може да помогне да се намали чешањето и да ги отстрани алергените од кожата на кучето. Консултирајте се со вашиот ветеринар каков медицински шампон да користите.

– Доколку се сомневате дека вашето куче има алергија на храна ќе треба да направите режим на исхрана со елиминација за да утврдите на која храна е алергично, а откако вашиот ветеринар ќе одреди на која конкретна храна е алергично ќе ви препорача хипоалергени брендови на храна или домашно зготвена храна.

Со оглед на тоа дека некои алергени не можат да се отстранат од околината на кучето, вашиот ветеринар ќе препорача терапија со лекови.
Антихистаминици помагаат кај мал процент кучиња и се даваат само со дозвола на ветеринар.
Суплементи со аминокиселини можат да помогнат да се обнови кожата и да го намалат чешањето.
Лекарства кои го подобруваат имунитетот можат да имаат добар ефект во ублажување на симптомите.
Доколку алергијата е прејака вашиот ветеринар може да препорача употреба на кортизон.

November 8, 2017 0 comment

Мачки

8 знаци дека треба да ја однесете мачката на ветеринар

ПРОМЕНА ВО ОДНЕСУВАЊЕТО

Мачките инстинктивно ја кријат болката, механизам за преживување кој го развиле за да бидат безбедни во дивината. Но ова не ja олеснува работата на луѓето кога има некаков проблем. Многу често, кога мачката не се чувствува добро, ќе почне да се крие за избегне интеракција со другите, ќе биде летаргична, ќе престане да се лиже и чисти или едноставно нема да се однесува како обично. Мачка која не се однесува исто како и секој ден е мачка која треба да ја однесете на преглед.

Овие знаци ќе бидат многу очигледно за вас иако се суптилни, бидејќи вие поминувате најмногу време со вашата мачка и го знаете нејзиното/неговото нормално секојдневно однесување. Овие знаци го вклучуваат нормалното однесување, движење, ниво на енергија, апетит, колку часови спие и слично.

ПРОМЕНА ВО АПЕТИТОТ

Мачките обично одбиваат да јадат кога не се чувствуваат добро, но како и да е некои болести ќе го зголемат апетитот на вашата мачка.
Промени во количината на вода која вашата мачка ја пие дневно, пример пиење на повеќе вода од обично, може да биде знак на дијабетес или заболување на бубрезите.

ПРОМЕНА НА БОЈАТА НА НЕПЦАТА

Бојата на непцата кај мачката може да покаже многу за нејзиното здравје. Здравите непца ќе имаат розова боја и доколку ги притиснете со прст бојата ќе се врати на нормалната за 2 секунди. Различна боја од розовата на непцата на вашата мачка е индикатор за различни видови на здравствени проблеми. На пример, сини непца покажуваат дека вашата мачка не добива доволно кислород и тоа може да биде опасно по нејзиниот живот. Жолти непца укажуваат на некаков проблем со црниот дроб.
Доколку забележите промена на бојата на непцата, веднаш однесе ја мачката на ветеринар.

МАЧКАТА СЕ ДВИЖИ ЧУДНО

Доколку забележите дека вашата мачка штеди една од нозете и не стапнува на неа или само се движи чудно веднаш однесете ја на ветеринар.
Може да се работи за повреда, фрактура, инфекција или атритис.

ПРОМЕНИ ВО РУТИНАТА НА КОРИСТЕЊЕ НА ПЕСОКОТ ЗА УРИНИРАЊЕ И ДЕФЕКАЦИЈА

Доколку вашата мачка уринира почесто од обично или покажува знаци на болка додека уринира како грчење или мјаукање, може да има уринарна инфекција или блокада на мочните патишта што претставува многу сериозна состојба. Уринирање или дефекација надвор од легенот со песок може да биде знак за бубрежни камчиња или циститис, но може да биде и знак на артритис што би го направило тешко и болно качувањето/влегувањето во легенот со песок.

Обратете внимание на фрекфенцијата и начинот на уринирање и дефекацаија на вашата мачка. Мачки кои одбиваат да го користат песокот, мачки кои имаат крв во урината или изметот и мачки со долготрајна дијареа треба веднаш да ги однесете на ветеринар.

ПОВРАЌАЊЕ

Кај мачките е нормално да повраќаат од време на време. Мачките знаат понекогаш да се прејадат и да го повратат вишокот храна што ќе го забележите како сува несварена храна. Исто така, мачките повраќаат и топки крзно поради тоа што кога се лижат и чистат тие ги голтаат влакната. Овие влакна не можат да ги сварат и претворат во измет па затоа од време на време ги повраќаат. Мачките знаат да повратат од возбуда или од страв.

Во секој случај, доколку повраќањето е зачестено и не е поради оправдана причина, доколку има крв по повратеното, или доколку повраќањето е придружено со летаргија, треба вашата мачка да ја однесете веднаш на ветеринар.

КАШЛАЊЕ

Долколку се работи за кашлање кое трае подолго од еден ден, може да се работи за нешто сериозно како астма, алергија, респираторно или срцево заболување. Доколку вашата мачка има потешкотии во дишењето и/или сино обоени непца, веднаш однесете ја на ветеринар.

October 31, 2017 0 comment

Кучиња

4 главни знаци дека треба да го однесете кучето на ветеринар

ГУБЕЊЕ НА АПЕТИТ

Повеќето кучиња ја обожаваат својата храна, па прескокнување на оброк треба да биде загрижувачки знак дека вашиот крзнен пријател не се чувствува добро. Некои раси на кучиња, како ловечките кучиња, се така дизајнирани да јадат многу наеднаш па да не јадат неколку дена. Доколку е кучето здраво, нема да му штети да прескокне оброк или два.

Но, нагло или постепено губење на апетитот укажува на здравствен проблем кој треба да го реши ветеринар. Одбивање да јаде (анорексија) може да биде особено опасно кај малите кутриња или минијатурните раси на кучиња, бидејќи предизвикува пад на шеќерот во крвта (хипогликемија).

Знаците кои треба да ги забележите кај болно куче со хипогликемија се:

– слабост и поспаност
– дезориентирано однесување (како пијано)
– нефокусирани „стаклени“ очи
– тресење, грчење или напади
– колабирање и онесвестување

ПОВРАЌАЊЕ

Повраќање е процесот на исфрлање преку устата дигестирана (сварена) храна или друга стомачна содржина. Ова е различно од процесот на регургитација на недигестирана (несварена) храна, што се случува скоро веднаш после јадење. Кучињата повраќаат многу полесно од другите животни. Понекогаш, кога желудникот им е „вознемирен“, кучињата имаат навика да јадат трева.

Нагла промена на храната (јадење на мрсна храна, јадење од корпата за ѓубре) може да предизвика повраќање. Понекогаш, кучињата стануваат толку многу емотивни дека нивниот сопственик го нема што повраќаат од вознемиреност. Иако не е нормално, повраќањето обично не е проблем ако се случи еднаш и вашето куче се однесува нормално после тоа.

Повраќањето не е дијагноза.
Повраќањето е знак за можен здравствен проблем како:

– вирусно заболување како парвовироза или штенечак
– токсични супстанци (чоколадо, отровни саксиски цвеќиња, човечки лекарства)
– голтање на предмети кои не се за јадење (парчиња од играчки, влечки, чевли, мебел)
– вродени проблеми (како мегаезофагус, би направило враќање на храната назад)

Непродуктивно повраќање (пробува да поврати но ништо не излегува), и/или крв во повратеното е итен случај што значи дека треба веднаш да го однесете кучето кај вашиот ветеринар.
Секогаш кога вашето куче ќе поврати 3 или 4 пати во ист ден, или два или повеќе дена по ред, треба да го посетите вашиот ветеринар.
Дури и ако се случува нерегуларно како неколку пати месечно, разговарајте со вашиот ветеринар за да ја откриете причината.

ДИЈАРЕА

Нормалниот измет кај кучињата има цврста форма и кафена боја. Дијареа – мека, течна, или пречесто одење надвор е нормално кај кучињата и најчесто е резултат на давање премногу грицки или јадење несоодветна храна.

Но, дијареата е исто така симптом на болести како парвовироза или штенечак, кои вклучуваат и повраќање и покачена телесна температура.
Хронична дијареа може да посочи на цревни паразити, нетолеранција на храна или алергија, а дури и воспаление на цревата.

Некои дијареи се знак на живото загрозувачки состојби.
Ако вашето куче има било кој од следниве знаци, веднаш однесете го на ветеринар.

– црна боја и изглед како масло од кола (укажува на крварење во дигестивниот систем)
– ужасен мирис (укажува на распаѓање на ткиво, чест наод кај парвовироза)
– има големи количини на црвена крв
– ако дијареата е придружена со повраќање, огромна болка, зголемена телесна температура, губење на апетит или летаргија

ДЕХИДРАЦИЈА

Телото на вашето куче содржи 60% вода. Повраќање и/или дијареа води до губење на водата од телото кое резултира со дехидрација. Дури и губиток на 5% вода покажува симптоми на дехидрација. Малите кученца можат особено да патат од живото загрозувачка дехидрација која може да доведе до шок, колабирање и смрт.

Ако дијареата на вашето куче е многу честа и скоро целосно течна, особено кога е придружена со повраќање, одбивање храна, летаргија, слабост и губење на еластицитетот на кожата, однесете го веднаш на ветеринар.
Постојат неколку едноставни начини да го проверите нивото на хидрација на вашето куче.

1.) поткренете ја кожата на вратот на кучето и потоа пуштете ја за да видите колку брзо ќе се врати на своето место. Со нормална хидрација кожата веднаш се враќа на своето место. Колку е поголема дехидрацијата, толку помалку еластицитет има кожата. Со мала дехидрација кожата ќе се враќа на место полека, но со екстремна дехидрација кожата ќе остане истегната и нема да се врати на своето место. Овие кучиња имаат потреба од итна ветеринарна нега.

2.) CRT е медицинскиот назив кој се користи за времето потребно за полнење на капиларите и се користи како начин за проверка и мерење на степенот на дехидрација кај животните. Овие мали капилари се наоѓаат во близина на површината на кожата и најлесно можат да се забележат на непцата над/под забите на вашето куче. Непцата треба да имаат нормална розова боја. За овој тест, треба да го притиснете непцето со прст. Ова за кратко го забавува дотокот на крв на тоа место и непцето станува бело или бледо розово. Кога ќе го тргнете прстот и притисокот од непцето, крвта се враќа назад во ткивото и ја добива својата нормална боја. Кај здрави кучиња, времето потребно за да се врати нормалната розова боја е 2 секунди. Доколку е потребно 3-4 или повеќе секунди за да се врати бојата вашето куче е дехидрирано и треба веднаш да го однесете на ветеринар.

October 30, 2017 0 comment